#МыКлапоцімся з «Карысцю»
- Апублікавана 29.09.2020 10:12
За 2019 год у Беларусі ўтварылася амаль за 3,8 млн тон побытавых адкідаў. Атрымліваецца па 400 кг на кожнага беларуса. Па дадзеных Сусветнага банка, Беларусь аднесена да катэгорыі верхняй групы краінаў з сярэднім даходам насельніцтва, норма па колькасці цвёрдых побытавых адкідаў вызначана ад 260 да 460 кг у год.
- 300 млн еўра губляе Беларусь з-за адсутнасці сістэмы «Зялёная кропка».
- 420 арганізацый займаюцца паасобным зборам смецця.
- 4,6% ВУП Беларусі – страты ад забруджвання прыроды.
- 20% адкідаў у Беларусі накіроўваецца на перапрацоўку.
- 714,3 тоны другаснай сыравіны сабралі ў 2018 годзе, у тым ліку 140 тон старых батарэек і 839 тысяч лямпачак.
- 50% смецця на звалцы – упакоўка, толькі 5% тары паступае ў паўторны зварот.
Студэнты атрада «КАРЫСЦЬ» пад кіраўніцтвам Пяхота А.М., арганізаванага на кафедры «Фізіка і энергаэфектыўныя тэхналогіі» узялі ўдзел у агульнарэспубліканскім мерапрыемстве «Мы Клапоцімся», арганізатарам якога штогод выступае «Рэспубліканскі цэнтр экалогіі і краязнаўства» у партнёрстве з унітарным прадпрыемствам «Кока-Кола Беўрыджыз Беларусь».
Экалагічнае мерапрыемства праводзіцца таксама пры падтрымцы Міністэрства прыродных рэсурсаў і аховы навакольнага асяроддзя Рэспублікі Беларусь і Міністэрства адукацыі Рэспублікі Беларусь у межах праграмы «Свет без смецця» унітарнага прадпрыемства «Кока-Кола Беўрыджыз Беларусь» (Coca-ColaHBCBelarus) па выкананні мэтаў устойлівага развіцця.
Варта адзначыць, што ў БелДУТ штогод праходзяць CleanUp-акцыі пад хэштэгам # МыКлапоцімся. Усё пачалося яшчэ ў 2012 годзе па прыкладзе падобнай акцыі, якая прайшла ў Эстоніі. Сёння, 26 верасня 2020 года, мы, студэнты БелДУТ ў складзе атрада «КАРЫСЦЬ», праводзілі акцыю «Мы Клапоцімся», звязаную з ачысткай левабярэжжа ракі Сож у раёне цэнтральнага парку Паскевічаў. Намі было сартавана і сабрана: 59,8 кг ПЭТ; 9,2 кг пластыка і плёнкі; 67,7 кг шкла і 131 кг астатніх адкідаў (смецця).
Сутнасць акцыі заключаецца ў тым, што каманды павінны самастойна вызначыць тэрыторыі, якія патрабуюць прыборкі, і ў дзень мерапрыемства сабраць смецце, умоўна падзяліўшы яго на 4 катэгорыі: «ПЭТ (поліэтылентэрэфталат)», «Пластык і плёнка», «Шкло», «Астатняе смецце».
Наступствы шматлікіх пікнікоў ліквідавалі студэнты БелДУТ. Самае крыўднае, што настолькі маляўнічыя месцы з’яўляюцца самымі праблемнымі і забруджанымі. У 2019 годзе больш за 300 удзельнікаў экалагічнага мерапрыемства сабралі каля 3 тон смецця ў 9 гарадах Беларусі.
Таму мы заклікаем усіх, хто любіць адпачываць на прыродзе, заставацца Людзьмі і пакідаць месцы адпачынку пасля сябе ў чысціні і парадку. Мы заклікаем Вас далучыцца да нашай акцыі і ўнесці свой унёсак у захаванне чысціні навакольнага асяроддзя. Вельмі важна сачыць за нашым навакольным асяроддзем і цудоўнай краінай, у якой мы жывём.
#МыКлапоцімся #NeverSettleBelarus
Пяхота А.М., Дзядовіч Ю.А.
фота – удзельнікі акцыі, студэнты гр. СЭ-41
Нашли ошибку? Выделите ее и нажмите Ctrl-Enter