Тры напрамкі супрацоўніцтва БелДУТ і ТIПБЭАД
- Апублікавана 14.10.2019 14:23
Жадаючы развіць і канкрэтызаваць дамоўленасці, дасягнутыя паміж ВНУ-партнёрамі БелДУТ і ТIПБЭАД вясной 2019 года, рэктар Ташкенцкага інстытута па праектаванні, будаўніцтве і эксплуатацыі аўтамабільных дарог Рыскулаў Алiмжон Ахмаджонавiч і дэкан Вiльданава Луіза Анвараўна 12 кастрычніка 2019 года наведалі наш універсітэт.
На сустрэчы з боку БелДУТ прысутнічалі першы прарэктар універсітэта Самадум Ю.Г., прарэктар па вучэбнай рабоце Казакоў М.М., дырэктар ІПК і ПК Зянкевіч А.Г., начальнік аддзела міжнародных сувязяў Шабзухаў Ю.А. і дырэктар Гомельскага каледжа - філіяла БелДУТ Шэвель А.А.
Кожны з прысутных змог пракаментаваць і ўнесці канкрэтныя прапановы па тых напрамках, у якіх зацікаўлены нашы партнёры з Узбекістана:
- навукова-даследчая праца (уключаючы навучанне магістрантаў і аспірантаў) і павышэнне кваліфікацыі прафесарска-выкладчыцкага складу;
- сумесныя адукацыйныя праграмы першай ступені;
- вопыт узаемадзеяння з каледжамі як філіяламі універсітэта.
Бакі дамовіліся падтрымліваць пастаянны дзелавы кантакт і абменьвацца прапановамі, якія прывядуць да ўстойлівай акадэмічнай мабільнасці і дазволяць вывесці міжнароднае супрацоўніцтва дзвюх ВНУ на той узровень, які быў зададзены ў выніку дасягнутых дамоўленасцей паміж кіраўнікамі Рэспублікі Беларусь і Рэспублікі Узбекістан у сферы адукацыі.
Пасля сустрэчы з сябрамі і калегамі ў БелДУТ госці папрасілі пазнаёміць іх з асаблівасцямі сярэдняй спецыяльнай падрыхтоўкі спецыялістаў у галіне аўтадарожнага будаўніцтва. Для іх была арганізавана экскурсія ў філіял «Гомельскі дзяржаўны дарожна-будаўнічы каледж імя Ленінскага камсамола Беларусі» УА РІПА, за што мы выказваем падзяку кіраўніцтву і выкладчыкам каледжа.
