«Як зрабіць першы крок у навуку?!» – Матывацыйная лекцыя студэнта трэцяга курса спецыяльнасці «Мытная справа» Уладзіслава Прохарава

Апублікавана 05.03.2024 14:07

• Мытная справа

27 лютага 2024 года студэнт трэцяга курса спецыяльнасці «Мытная справа» Уладзіслаў Прохараў падзяліўся сваім досведам навуковай працы са сваімі малодшымі калегамі – студэнтамі першага і другога курса гэтай спецыяльнасці.

За апошні год Уладзіслаў падрыхтаваў дваццаць публікацый, тэматыка якіх вельмі шырокая і закранае наступныя напрамкі: міжнародныя эканамічныя адносіны і міжнародныя транспартныя сістэмы, арганізацыя мытнага і іншых відаў дзяржаўнага кантролю на мяжы, нацыянальная бяспека, праблемы вышэйшай адукацыі і інш.

Навукоўцам не нараджаюцца, імі становяцца ў выніку ўпартай і карпатлівай працы! Менавіта гэтую ісціну і паспрабаваў данесці Уладзіслаў да малодшых курсаў, звярнуўшы ўвагу на тое, што публікацыйная актыўнасць і, у цэлым, навуковая праца, даюць не толькі перавагі ў выглядзе дадатковых заахвочванняў на занятках, павагі выкладчыкаў і аднакурснікаў, але таксама спрыяюць памнажэнню ведаў, паляпшэнню навыкаў аналітычнай працы, павышэнню пісьменнасці, ўдасканаленню здольнасці канкрэтна выкладаць свае думкі, ўзбагачэнню вуснай мовы. Таму для студэнта, які імкнецца да развіцця і самаўдасканалення, актыўны ўдзел у навуковай дзейнасці – абавязковая ўмова поспеху ў гэтай справе.

Таксама Уладзіслаў звярнуў увагу на такія асаблівасці арганізацыі самога працэсу, як выбар і абмеркаванне тэмы даследавання, работа з навуковым кіраўніком, падрыхтоўка да выступлення на канферэнцыі па тэме дакладу. Не засталіся па-за ўвагай пытанні навуковай этыкі, якія тычацца несумленных запазычанняў у публікацыях і плагіяту.

Матывацыйная лекцыя Уладзіслава не аказалася марнай. Ужо праз два дні студэнты другога курса адправілі пяць публікацый на канферэнцыю, а студэнты першага курса звярнуліся да выкладчыкаў кафедры з просьбай дапамагчы вызначыць найбольш перспектыўныя напрамкі ў сферы эканомікі, кіравання, мытнай справы і эканамічнай бяспекі.

Кафедра жадае далейшых навуковых поспехаў Уладзіславу Прохараву і ўсім студэнтам спецыяльнасці «Мытная справа»!

Антон Пятроў-Рудакоўскі