Дню памяці воінаў-інтэрнацыяналістаў прысвячаецца

Апублікавана 13.02.2024 17:12

13 лютага 2024 года ў Беларускім дзяржаўным універсітэце транспарту адбылася дыялогавая пляцоўка, прысвечаная Дню памяці воінаў-інтэрнацыяналістаў, дню завяршэння выканання баявой задачы абмежаваным кантынгентам савецкіх войскаў у Афганістане.

Больш за трыццаць тысяч ураджэнцаў Беларусі выконвалі інтэрнацыянальны абавязак. Дзевяцігадовая вайна забрала жыцці 15 тысяч салдат і афіцэраў. 771 беларус не вярнуўся на Радзіму...

Экспертамі дыялогу выступілі:

• Аляксандр Драбезаў – старшыня Гомельскай гарадской арганізацыі грамадскага аб'яднання «Беларускі саюз ветэранаў вайны ў Афганістане».
• Васіль Крываногаў – савецкі і беларускі самбіст і дзюдаіст, майстар спорту міжнароднага класа СССР па самба, майстар спорту СССР па дзюдо. Суддзя нацыянальнай катэгорыі па самба і дзюдо.
• Сцяпан Васільеў – прарэктар па выхаваўчай рабоце БелДУТ.

Уступнае слова ўзяў член гісторыка-патрыятычнага клуба «Айчына» Райко Аляксандр, студэнт 3 курса спецыяльнасці «Мытная справа». Аляксандр прадэманстраваў форму і абмундзіраванне салдат, якія неслі службу ў Афганістане, і распавёў пра тое, як шануюць памяць аб іх подзвігу ў нашым універсітэце.

Аляксандр Віктаравіч Брабезаў, які сам 35 гадоў таму выконваў інтэрнацыянальны абавязак удалечыні ад Радзімы ў гвардзейскіх паветрана-дэсантных войсках, падрабязна распавёў прысутным аб баявых аперацыях і ваенных падзеях у Афганістане. Гісторыі самаадданых подзвігаў савецкіх салдат, салдацкім сяброўстве і ўзаемадапамогі не пакінулі абыякавымі нікога з прысутных.

Як чалавек, чый лёс цесна сплецены з лёсам Айчыны, ён не мог не гаварыць пра тое, як важна захоўваць такую каштоўнасць – мір. І ў завяршэнне свайго выступлення прачытаў аўтарскія вершы пра Вялікую Айчынную вайну.

Пра тое, як умацоўваць сілу духу, штодня робячы правільны выбар, быць гатовымі заўсёды стаць на абарону Радзімы, казаў моладзі майстар спорту Васіль Іванавіч Крываногаў.

Студэнты і супрацоўнікі нашага ўніверсітэта атрымалі магчымасць задаць пытанні гасцям. Маладых людзей цікавіла ўсё, што звязана з гістарычнымі падзеямі тых гадоў, што адбываецца зараз і чым займаецца абласная арганізацыя Беларускага саюза ветэранаў вайны ў Афганістане.

Аляксандр Віктаравіч, адказваючы на пытанні, распавёў пра гісторыю ўзаемаадносінаў СССР і Дэмакратычнай Рэспублікі Афганістан, раскрыў прычыны, па якіх СССР быў вымушаны прыняць удзел у ваенных дзеяннях на тэрыторыі гэтай дзяржавы, успомніў, з якімі цяжкасцямі сутыкаліся нашы вайскоўцы падчас гэтай вайны. Распавёў пра тое, як склаўся лёс ветэранаў афганскай вайны, якія пражываюць у горадзе Гомелі, а іх, дарэчы сказаць, звыш 1300 чалавек, як падтрымлівае іх Беларускі саюз ветэранаў вайны ў Афганістане.

Сцяпан Міхайлавіч Васільеў, звяртаючыся да нашых студэнтаў і курсантаў, выказаў упэўненасць у тым, што наша моладзь ведае, як важна вучыцца на ўроках мінулага, яна ўсімі сіламі імкнецца да захавання міру на беларускай зямлі. Прыклад для нас – людзі, якія з'яўляюцца ўзорам мужнасці і стойкасці.

Таццяна Модзіна

Фота Алены Белавус